அ முதல் ஃ வரை …!
அ- அதிசயிக்க மறந்துவிட்டேன்
அதிசயமே நீ என்பதால்
ஆ- ஆர்ப்பரிக்க மறந்துவிட்டேன்
அலைகடல் நீ என்பதால்
இ- இரவை ரசிக்க மறந்துவிட்டேன்
என் நிலவே நீ என்பதால்
ஈ – ஈகை செய்ய மறந்து விட்டேன்
ஈகையின் இருப்பிடம் நீ என்பதால்
உ- உலகைக் காண மறந்துவிட்டேன்
என் உலகமே நீ என்பதால்
ஊ- ஊஞ்சலில் ஆட மறந்துவிட்டேன்
என் தென்றல் நீ என்பதால்
எ- எழுதுகோலைப் பிடிக்க மறந்துவிட்டேன்
என் இறகு நீ என்பதால்
ஏ- ஏட்டைப் படிக்க மறந்துவிட்டேன்
ஏடே நீ என்பதால்
ஐ – ஐயமிட மறந்து விட்டேன்
உன்னிடம் யாசகனாகிப் போனதால்
ஒ – ஒலியை மறந்துவிட்டேன்
சப்தங்கள் நீயாகிப் போனதால்
ஓ – ஓவியத்தை மறந்துவிட்டேன்
பிம்பமே நீயாகிப் போனதால்
ஔ – ஔடதத்தை மறந்துவிட்டேன்
ஔடதமே நீயாகிப் போனதால்
ஃ – ஆயுதத்தை மறந்துவிட்டேன்
உன் விழியே எனதாகிப் போனதால்…
உமையாள்
