ஓட்டம்
கருவறை முதல் கல்லறை வரை
ஒரு பெரு ஓட்டம்
நடு நடுவே சிற்சில சில்லறை
ஓட்டங்கள்
பத்து மாதத்தில் உலகைத் தொட்டுவிட
ஒரு ஓட்டம்
பிறந்த எட்டு மாதத்தில் அடி எடுத்துவைக்க
மறு ஒட்டம்
இரட்டை வயதிற்குள் மழலையைக் கொட்டிவிட
குட்டி ஒட்டம்
பால்குடி மாறா வயதில் பால்வாடிக்கு
ஒரு குறு ஓட்டம்
பள்ளிக்கு சித்தம் கலங்கிட நித்தம்
ஒரு ஓட்டம்
கன்னியரும் காளையரும் கரைகாணா பேரின்ப
பெரு ஓட்டம்
நிலையில்லா மாந்தர்க்கு நிலையான ஆஸ்திக்கு
நிகரில்லா ஒரு ஓட்டம்
சவமான உன்னைச் சீக்கிரமாய் சிவபுரம் சேர்க்கும்
கடைசி ஓட்டம்
-சத்யா-
