சொர்க்கம் நேரிலே!
செல்வத்தில் முதற் செல்வம் உடல்நலம் – இதைச்
சிந்தையிலே ஏற்றால்தான் வரும் பலம்
உள்ளத்தில் அமைதிமிக அவசியம் – இதை
உணர்தலே ஆரோக்கிய ரகசியம்
இயற்கைநெறி தவறிடாமல் வாழ்வதே – நம்
இதயபலம் உடல்நலத்தைக் காண்பதே!
செயற்கை முறை வா.ழ்க்கையினைத் தவிர்ப்பது – தூய
சிந்தனையில் உடல்நலத்தை அழைப்பது
தூயகாற்று தூயநீர் உணவுகள் – இவை
தொடர்ந்துவரும் நலத்துக்கான நனவுகள்!
ஓயாது தென்றலாய் காற்றுதான் – நம்
உடல்நலத்தைக் காப்பாற்றும் ஏற்றுதான்.
உடல்நலம் கடிகாரம் உண்மைதான் – அது
ஒழுங்காக இயங்குவது நன்மைதான்
தடம்மாறி நேரம் காட்டக் கூடாது – நாம்
தடுமாறும் வாழ்க்கை வாழக்கூடாது!
நடைப்பயிற்சி உடற்பயிற்சி தினம்தினம் – மனம்
நன்றாக ஒன்றிச் செய்தல் பெருந்தனம்
கடைசிவரை நலத்துடனே வாழ்வதே – நம்
கண்முன்னே தெரியும் சொர்க்கம் நேரிலே!
கவிப்பேரொளி நீரை. அத்திப்பூ
