கவித்துளிகள்

எங்கு கற்றாயடி

பிறந்த வீட்டில் ராணியாகவும்
புகுந்த வீட்டில் ஏணியாகவும்
வலம் வருகின்ற பாங்கினை
எங்கு கற்றாயடி !
 

வாழ்ந்த வீட்டிற்கும்
வாழவந்த வீட்டிற்குமான
இயற்கைச் சீற்றங்களைத்
தென்றலாக மாற்றிடும் சூட்சுமத்தை
எங்கு கற்றாயடி !
 

தாவணிக் கனவுகளைத் தரிசாக்கி
பருவ நினைவுகளைப் பயிராக்கி
ஆனந்தப் பூங்காற்றாய் வீசும் வித்தையை
எங்கு கற்றாயடி !
 

திருமணம் எனும் நன்னாளில்
ஆன்றோர் பலர் முன்னிருக்க
தன் பெயரும் மாறிப்போக
கும்பிட்ட குலசாமியும் தொலைந்துபோக
தோழிகள் வாழ்த்துக்களும் அட்சதைகளாகிப்போக
மெளனமே மொழியாகி நிற்க
எங்கு கற்றாயடி !
 

உன்  ஒற்றைப் புன்னகையால்
புறம்பேசுவோரை முறத்தால்
புறந்தள்ள எங்கு படித்தாயோடி!

 
நீரின்றி அமையாது இவ்வுலகு!
நீயின்றி அசையாது இவ்வுலகு!
பெண்ணே !!! நீ தாயுமானவளே !!!

=============================================

 
உயிர்க்கொல்லி!

 
பிறப்பையே வெறுக்க வைக்கும்
ஒரே உயிர்க்கொல்லி
பாசம்!

 
பிறப்பையே அசர வைக்கும்
ஒரே உயிர்க்கொல்லி
அன்பு!

 
பிறப்பையே அர்த்தமுள்ளதாக்கும்
ஒரே உயிர்க்கொல்லி
பிரிவு!

 
பிறப்பையே உரைய வைக்கும்
ஒரே உயிர்க்கொல்லி
காதல்!

 
பிறப்பையே  அதிர வைக்கும்
ஒரே உயிர்க்கொல்லி
நேசம் !

 
பிறப்பினை உலகறிய வைக்கும்
ஒரே உயிர்க்கொல்லி
பற்று!

 
பிறப்பையே உலுக்க வைக்கும்
ஒரே உயிர்க்கொல்லி
இறப்பு!!!

 
=============================================

முத்தம்

 
காதல் கடனில்
வட்டியும்  முதலும்
மொத்தமாய் – அவளின்
முத்தம்!

 
காதல் கடலில்
முத்தும்  பவளமும்
வைரமுமாய் – அவளின்
முத்தம்!

 
காதல் படகில்
துடுப்பும்  உடுப்பும்
இடுப்புமாய் – அவளின்
முத்தம்!

 
காதல் வானில்
மின்னலும்  இடியும்
மழையுமாய் – அவளின்
முத்தம்!

 

• உமையாள்